KARRIGJA

Kur ra një ditë nga karrigja e Pushtetit

Në rrugë ecte me këmbë i dëshpëruar

Njerëzit që kalonin krahas për në punë

Siç i kishte parë e kishin shikuar.

Maj 2025

PORTIERI

Na ishte një mjek

Djall e shkuar djallit

Me vrap pas vizitës

Tek porta e spitalit

Sa vinte dikush

E kapte për krahu

Dhe thoshte me vete:

“Më doli sot gjahu”

-Nuk jam për tek ju-

I thoshte ndonjë.

Ai e tërhiqte

Dhe i thosh: S’ka gjë.

Dikush tjetër thoshte:

-“Kam gruan shtatzanë”

-Eja ta shoh unë

Pastaj shko në radhë.

Njerëzit hallexhinj

Kishin gjet belanë

Me doktor “Portierin”

Që u mirr paranë.

Maj 2025

TIMONI

Po ç’pate moj e uruar

Me telefon nëpër duar

Me timonin të lëshuar

Kush të kishte mallëkuar?!!!

Familja të kish ormisur

Për rrugën ku ishe nisur

Po nuk të la kokë e krisur

Punën ta kishe bitisur.

Timoni kapadai

Oh sa kish parë si ti

Të vërtiti në kanal

Thuaj shyqyr që je gjallë.

KAMIKAZI

Imitoi kryebanditin

Shau, shkatërroi sa mundi

U bë shumë i neveritshëm

Nga qyteti dhe katundi.

Shpresonte të fiton famë

Vlerat e njeriut humbi.

NË FSHAT

Një ëndërr të bukur sonte përjetova

Sa shumë u shplodha dhe u lumturova!

Bashkëfshatarët ulur anash fushës sportit

Duke ndjekur ndeshjen siç ndodhte që motit.

Të rinj të moshuar, me dhjetra fëmijë

Kush nuk ka dëshirë mes tyre të rrijë,

Të dëgjojë batuta me humor me thumba.

Të gjithë si ëngjëj, të gjithë si pëllumba.

Ah moj kohë e bukur, ah moj kohë e shkuar

Që s’të gjej gjëkundi, që më je larguar,

Sa shumë të kam dashur me shpirt e me zemër

Tani të shijoj rrallë herë në ëndërr.

28 maj 2025

TI FJETE

Ti sonte e bëre gjumin të qetë,

Unë disa herë u përgjuma dhe u zgjova

Ti s’më ke faj, atë e kam vetë

Që profesionin e mjekut e zgjodha.

Ti sonte fjete nga ankthi i çliruar

Këtë barrë tek unë e shkarkove

Ti vetë këtë e ke kuptuar

Në momentin që u vizitove.

Sa netë si kjo si kam mbyllur sytë,

Sa netë si kjo jam gdhirë pa gjumë,

Herë në krevat në shtëpinë time,

Herë pranë vuajtësit me halle shumë.

1 prill 2025

NË SHTRUNGË

Moj vashëz me sy të shkruar

Që pret rrugëve çdo natë

Pa më thuaj: “Me hamshorët

Gjete lodhje, a rehat?”

Pse s’martohesh me një burrë

Të kesh familje, fëmijë,

Por kalon qindra në shtrungë

Të bardhë, bjondë e të zinj?

21 MARS 2025

KAFENEJA

Sa dielli nxjerr pak syrin,

Si koshere kafeneja,

Tek-tuk ndonjë i moshuar

Mbushur me të rinj, të reja.

Më thotë një miku im

I ardhur prej Amerikës:

-Mese rroni ju shqiptarët

Në kafe gjithë orët e ditës?!!!

-A ta dish, o miku im,

Shumë prindër ç’i ka gjet,

Sot pleqërojnë fëmijët

Me mundime plot siklet.

ÇFARË PE?

Vjehrri, vjehrra në divanë

Duke pirë çaj në filxhanë:

-“Ç’pe natën?” - nuses i thanë.

-Ca mjerushe, ca mjeranë

Bërtisnin, tundën dynjanë,

Dhe u puthën, dhe u shanë,

Një fjalë të keqe nuk lanë,

Vetë u pleksën, vetë u ndanë.

12 mars 2025

FANTAZMA

Shijoi çfarë pa dhe dëgjoi në jetë

Profesionet me radhë, Partitë dhe Fetë.

I ngopur, pa ëndrra natën kishte fjetur

Një shoqe të jetës si veten kishte gjetur.

Pak e përkrahën, shumë e kishin sharë

Mendjen ai kurrë nuk e kishte vrarë.

Në biseda nga njerzit ishte pagëzuar:

“Fantazmë i pacipë, me tru lëngëzuar”.

KAMELEONI

I mjeri Kameleon

Çdo ditë rrugën e ndryshon,

Herë i qeshur të shikon,

Herë i vrejtur guvë, stogon.

Dje të mburrte me pasion,

Sot të shan e të mallkon,

Po qe se prej ty s’fiton.

Kameleoni mjeran

Dhe fëmijët bën kurbanë

Kur me të një mendje s’kanë.

6 mars 2025

PREMTIM FUSHATE

Sa zgjohet bufi i kënetës

Fillon i bie gërrnetës,

Skifterët, sorrat trumpetës,

Peshqit dhe ngjalat gavetës.

Me kërmij e me laraska

Me kafshë të holla, të trasha

Mbushet sheshi plot përplot

Fjalë e bufit i përlot.

“Sot do t’u them të vërtetën,

Kam për t’u ndryshuar jetën,

S’do ketë më fukarenj,

Pa diplomë e budallenj....

Lumthi kush do të jetojë

Në hijen time të rrojë!”

ZVARRANIKU I SHËRUAR

Zvarraniku i shëruar

Ndihmë fshatit kish kërkuër

Disa herë ishte betuar:

-Më besoni kam ndryshuar,

Shumë keni për të fituar.

Po më hipët prap në pemë

E mira do të mbuloj dhenë...

E dëgjuan mirë-mirë

Dhe të gjithë kthyen kurrizë.

Askush s’e besoi prapë

Mashtruesin që kish damkë.

FIRIFIU

Firifiu mendjelehtë

Në çast vendime merr vetë.

Për të shitur, për të blerë

Objektet me shumë vlerë.

Nuk pyet më njeri tjetër

Specialist a më të vjetër.

Etja për xhepin e madh

E bë me tension dhe ankth.

Mendon natën i pa gjumë

Si do të fitojë më shumë.

Gjitoni që ka në kra

Flë qetë, punon dhe ha.

Paraja e madhe me thes

Të thyen një ditë në mes.

Luftojeni këtë ves!

1 mars 2025

FALIMENTIMI

Mori borxhe në të njohur

Sa s’kishin të numëruar.

Me bizneset që kish hapur

Shpejt kishte falimentuar.

Për kredinë që s’kish shlyer

Shtëpia ish konfiskuar.

Me çantën mbushur me celësa

Ecte rrugëve dëshpëruar.

Ndaj, o mik, kur harton planin,

Shtrij këmbët sa ke jorganin!

POROSIA

Më tha gjyshi fjalë me vend

-Mos shko pranë kur zihen qen

Ndrysho rrugën ec përpara

S’të duhen sherre të shara.

Dëgjo nip uratën paç,

Mos u pleks me qen rrugaç!

Ti shiko veç punën tënde

Qentë e rrugës s’marrin mendje.

25 shkurt 2025

ZJARRI I DASHURISË

-Ku shkon në këtë dimër

Me barkun zbuluar ?

Përse s’vesh një bluzë

Moj vashë e uruar?

-S’më kupton xhaxha,

S’e merr dot me mend,

Zjarri i dashurisë

Të djeg e të çmend.

E DI

Një grua me bastun

Sa dielli ka lerë

Çëk-çëk nëpër rrugë

E shikoj çdo herë.

Një ditë s’mu durua

E ndal dhe i them:

-Moj nënë e nderuar

Ke vajza dhe djem?

-Kam o bir, kam plot-

Si me dert më thotë-

Asnjë s’kam këtu

Të gjithë nëpër botë.

-Aty ku kalon

Të shtyp biçikleta

-E di bir e di

Më është rëndur jeta.

ZGJIDHJE

Posa ndrydhi këmbën

Shkoi në spital

"Nuk ke gjë, - i thanë-

Shko me dhen në mal!”

Ashtu bë djaloshi

Shkoi në shtëpi

Nesër që pa gdhirë

Me dhen e me dhi.

Kaloi një muaj

Këmba mos më keq

Shpresa iu venit

Zvarrë-zvarrë e heq.

Jashtë shtetit shkoi

Në goxha klinikë

"Shumë vonë ke ardhur

S'kam ç’të bëj, o mik!"

S'iu durua labit

Dhe dy fjalë i thotë:

“Ta ndrydh prapë tani

Ma riparon dot?”

28 janar 2025

BUDUA

Mesi i nëntorit ajo ditë pat qënë,

Kurveleshi mbuluar me borë të rëndë.

Çobanët me kopetë të ikur në vërri

Në male nuk gjeje as kafshë, as njeri.

Si fillim jave qysh herët mora rrugë

Në fshatra të tjerë do të shkoja në punë.

Duke ecur në dëborë lart në mal

Përpara më del një qen sa një kalë.

Atë ditë për herë të parë

Një shkop në dorë nuk e kisha marrë.

Frika më hyri, por veten nuk e dhashë

Qeni nuk lëvizi dhe unë përrreth pashë.

Pas pak minutash unë dhe ai,

Ashtu pa kuptuar lidhëm miqësi.

Qenin borë të bardhë, Budo e pagëzova

Kur një të ngjashëm të rinisë kujtova.

Ai një sjellje miqësore bëri

Shpejt më iku frika edhe m’u trash zëri.

Kur arrita në fshat njerëzit më shikonin

Në mendje të tyre nuk di çfarë shkonim.

Disa muaj të dimërit vëllezërit e mi

E ushqyen, e mbajtën si roje në shtëpi.

Në mezin e majit kur u kthyen kopetë

Budua u largua për në stan të vet.

4 prill 2025